நாடாளுமன்றக் குழுத் தலைவர் பதவி - சிறீதரனை விலக்க அரசியல் குழு முடிவு! - சுமந்திரன்

இலங்கைத் தமிழரசுக் கட்சியின் அரசியல் குழுவின் பணிப்பை நாடாளுமன்ற உறுப்பினர் சிவஞானம் சிறீதரன் ஏற்றுக்கொள்ள மறுத்ததால், கட்சி தமிழரசுக் கட்சியின் நாடாளுமன்றக் குழுத் தலைவர் பதவியை அவரிடமிருந்து மீளப் பெற முடிவு செய்துள்ளதாக கட்சியின் பொதுச்செயலாளர், ஜனாதிபதி சட்டத்தரணி எம்.ஏ. சுமந்திரன் தெரிவித்துள்ளார்.

மட்டக்களப்பு - களுவாஞ்சிகுடியில் நடந்த நிகழ்வில் கலந்து கொண்ட பின்னர் ஊடகங்களுக்கு கருத்து தெரிவிக்கும்போது அவர் இதை தெரிவித்துள்ளார்.

சுமந்திரன் மேலும் கருத்து தெரிவிக்கையில்;

“சிறீதரனுக்கு நாடாளுமன்றக் குழுத் தலைவர் பதவி தமிழரசுக் கட்சியின் அரசியல் குழுவினால் வழங்கப்பட்டது. தேர்தல் முடிந்த பின்னர் வவுனியாவில் அரசியல் குழுவின் கூட்டத்தில், மாவை சேனாதிராஜாவும் கலந்திருந்தார்.

அப்போது தேசியப் பட்டியல் ஆசனத்தை வைத்தியர் சத்தியலிங்கத்துக்கு வழங்குவதும், நாடாளுமன்றத்தில் கொறடா பதவியையும் அவருக்கே வழங்குவதும் தீர்மானிக்கப்பட்டது.

நாடாளுமன்ற நடவடிக்கைக் குழுவின் பிரதிநிதியாக நாடாளுமன்ற உறுப்பினர் இரா.சாணக்கியனையும் நியமிக்க தீர்மானிக்கப்பட்டது.

நாடாளுமன்றக் குழுத் தலைவர் பதவிக்கு சிறீதரனை நாங்கள் நியமித்தோம்.

நேற்று திருகோணமலையில் நடந்த கூட்டத்தில் இதற்கான விஷயங்கள் ஆராயப்பட்டன.

அரசியல் குழுவால் நியமிக்கப்பட்ட பதவிகளை மாற்றுவதற்கான அதிகாரம் அந்தக் குழுவுக்கே உள்ளது. தமிழரசுக் கட்சியின் அரசியல் குழுவின் ஆலோசனையை சிறீதரன் ஏற்றுக்கொள்ள மறுத்ததால், அவரிடமிருந்து நியமனத்தை மீட்பதற்கு அரசியல் குழு தீர்மானித்தது.”

“அரசியல் குழு அவர் மீது நம்பிக்கை வைத்து ஏகமனமாக நாடாளுமன்றக் குழுத் தலைவர் பதவியை வழங்கியது. அதே அரசியல் குழு இருமுறை அவர் அரசமைப்புக் கவுன்சிலிலிருந்து ராஜினாமா செய்ய வேண்டும் என்று ஆலோசித்தது. நேற்று சுமார் நான்கு மணி நேரம் அந்த கருத்தை அவரிடம் வலியுறுத்தினோம். அதனால் கட்சியின் எந்த உயர்குழுவும் அவர் அந்தப் பதவியை ஏற்றுக்கொள்ளவில்லை என்றால், அந்த பதவியை அவரிடமிருந்து எடுப்பதே தீர்மானமாகியுள்ளது.”