"என்னை கேலி செய்தவர்கள் இப்போது கேலிப் பொருளாக மாறிவிட்டனர்". - சஜித் கருத்து!

"என்னை கேலி செய்தவர்கள் இப்போது கேலிப் பொருளாக மாறிவிட்டனர்". - சஜித்  கருத்து!

உலக பொருளாதார மன்றத்தில் அமைச்சர் சுனில் ஹந்துன்னெத்தி ஆற்றிய உரையில் அவரது ஆங்கிலப் பயன்பாடு சமூக ஊடகங்களில் கேலிக்கு உள்ளான சர்ச்சைக்கு, எதிர்க்கட்சித் தலைவர் சஜித் பிரேமதாச பதிலளித்துள்ளார்.

அம்பாறை, கோணகலவில் உள்ள ஸ்ரீ சுமங்கலராம விகாரையில் நடைபெற்ற மத நிகழ்வில் பேசிய போதே சஜித் பிரேமதாச கருத்துக்களை முன்வைத்துள்ளார்.

- பாராளுமன்ற உறுப்பினர்,எதிர்க்கட்சித் தலைவர் சஜித் பிரேமதாச கருத்து,

ஆங்கிலக் கல்வியை ஊக்குவித்ததற்காக ஒரு காலத்தில் தன்னை கேலி செய்தவர்கள் இப்போது தம் மீதான கேலி கிண்டல்களை எதிர்கொள்கின்றனர் என்று கூறினார்.

"ஆங்கிலக் கல்வியின் முக்கியத்துவம் பற்றி நான் முன்பு பேசியபோது, ​​நான் கேலி செய்யப்பட்டேன். ஆனால் இன்று, அதே நபர்கள் கேலிப் பொருளாக மாறிவிட்டனர். நான் யாரையும் அவர்களின் ஆங்கிலத்திற்காக ஒருபோதும் கேலி செய்ததில்லை. நவீன உலகத்திற்கு நம்மை தயார்படுத்தத் தவறிய காலாவதியான கல்வி முறைதான் நாட்டின் உண்மையான பிரச்சனை," என்று அவர் கூறினார்.

எதிர்க்கட்சியில் இருந்தபோதும், சக்வாலா திட்டத்தின் மூலம் கணினிகள், ஸ்மார்ட் போர்டுகள் மற்றும் அச்சுப்பொறிகளை நன்கொடையாக அளித்து பாடசாலைகளை மேம்படுத்த நடவடிக்கை எடுத்ததாகவும், ஆங்கிலம் மற்றும் தகவல் தொழில்நுட்பக் கல்வியின் மதிப்பை தொடர்ந்து வலியுறுத்தியதாகவும் பாராளுமன்ற உறுப்பினர் சஜித் கூறினார்.

ஆங்கில வழிக் கல்வி என்பது பணக்கார குடும்பங்களுக்கு மட்டுமேயான சலுகையாக இருக்கக்கூடாது, மாறாக நாட்டின் அனைத்து சமூகத்தினரும் அணுகக்கூடிய அடிப்படை உரிமையாக இருக்க வேண்டும் என்று அவர் வலியுறுத்தினார்.

கோயில்கள் மூலம் அறக் கல்வி மற்றும் தகவல் தொழில்நுட்பக் கல்வியை ஊக்குவிக்க வேண்டும் என்றும், மத நிறுவனங்களை நவீன கற்றலுக்கான சமூக மையங்களாக மாற்ற வேண்டும். என்றும் எதிர்க்கட்சித் தலைவர் கூறினார்.

"கிராமப்புற குழந்தைகளும் உலகளாவிய அறிவைப் பெறுவதை நாம் உறுதி செய்ய வேண்டும். ஆங்கிலம் மற்றும் தகவல் தொழில்நுட்பக் கல்வி கொழும்பின் உயரடுக்கினருக்கு ஒரு ஆடம்பரமாக இருக்கக்கூடாது. இது கிராமம் முதல் நகரம் வரை ஒவ்வொரு குழந்தைக்கும் ஒரு உரிமையாக இருக்க வேண்டும்," என்று எதிர்க்கட்சித் தலைவர் சஜித் பிரேமதாச தெரிவித்தமை குறிப்பிடத்தக்கது.