மேலும் ஒரு அ.தி.மு.கவின் எம்.எல்.ஏ. இராஜினாமா; த.வெ.கவில் இணைந்தார் அம்பாசமுத்திரம் சுப்பையா

அ.தி.மு.க. எம்.எல்.ஏ இசக்கி சுப்பையா, தனது பதவியை இராஜினாமா செய்துவிட்டு த.வெ.கவில் இணைந்துள்ளார்.

தமிழகத் தேர்தலில் அ.தி.மு.க 3 ஆவது இடத்துக்கு தள்ளப்பட்டது. இதையடுத்து அ.தி.மு.க பொதுச் செயலாளர் பழனிசாமிக்கு எதிராக சி.வி.சண்முகம், எஸ்.பி.வேலுமணி தலைமையில் எம்.எல்.ஏக்கள் சிலர் தனி அணியாகச் செயல்படுகின்றனர். இந்த அணியில் இருந்த மரகதம் குமரவேல், சத்யபாமா, ஜெயக்குமார் ஆகியோர் தங்களுடைய எம்.எல்.ஏ பதவிகளை நேற்று முன்தினம் இராஜினாமா செய்தனர். பிறகு அவர்கள் த.வெ.கவில் இணைந்தனர்.

அ.தி.மு.க. எம்எல்ஏக்களின் இராஜினாமா கடிதங்களைப் பேரவைத் தலைவர் ஜே.சி.டி. பிரபாகர் ஏற்றுக் கொண்டார். அத்துடன் 3 பேரும் வெற்றி பெற்ற மதுராந்தகம், தாராபுரம், பெருந்துறை சட்டப்பேரவைத் தொகுதிகள் வெற்றிடமாகின என அறிவிக்கப்பட்டது. இந்நிலையில் சி.வி.சண்முகம் அணியில் உள்ள அம்பாசமுத்திரம் எம்.எல்.ஏ. இசக்கி சுப்பையா நேற்று தனது பதவியை இராஜினாமா செய்தார். அதற்கான கடிதத்தை ஜே.சி.டி. பிரபாகரிடம் கொடுத்தார். ஆனால் அந்த கடிதத்தை ஏற்க அவர் மறுத்தார்.

அப்போது அவர் கூறுகையில், ‘‘இராஜினாமா செய்வதாக கைப்பட எழுதிய கடிதத்தை மட்டுமே ஏற்க முடியும். தட்டச்சுசெய்து அதில் கையெழுத்திட்டகடிதத்தை ஏற்க முடியாது." என்று தெரிவித்தார். அதைத் தொடர்ந்து, கைப்பட இராஜினாமாகடிதத்தை எழுதி, பேரவைத் தலைவரிடம் இசக்கி சுப்பையா வழங்கினார். அதை பேரவைத் தலைவர் ஏற்றுக் கொண்டார். பின்னர் பனையூரில் உள்ள த.வெ.க. அலுவலகத்தில் அமைச்சர்கள் செங்கோட்டையன், ஆனந்த் முன்னிலையில் இசக்கி சுப்பையா த.வெ.கவில் இணைந்தார்.

இதுதொடர்பில் செய்தியாளர்களிடம் பேசிய சுப்பையா, ‘‘எதிர்க்கட்சி எம்.எல்.ஏவாக பெரிய அளவில் நலத்திட்டங்களைக் கொண்டு வரமுடியவில்லை. இப்போது என் அம்பாசமுத்திரம் தொகுதிக்கு பல நலத்திட்டங்களைக் கொண்டு வர வேண்டும் என்ற ஒரே நோக்கத்தில் த.வெ.கவில் இணைந்துள்ளேன்.” - என்றார்.