பொருளாதாரத்தைச் சுருங்க அனுமதிக்க மாட்டோம் - வாகன இறக்குமதி விவகாரத்தில் அரசாங்கம் தெளிவு

அரசாங்கம் வாகன இறக்குமதிகளை முழுமையாக கட்டுப்படுத்தவோ அல்லது பொருளாதார நடவடிக்கைகளை சுருக்கவோ எந்தவித நோக்கமும் அரசுக்கு இல்லை என பிரதி நிதி அமைச்சர் அனில் ஜயந்த பெர்னாண்டோ தெரிவித்துள்ளார்.

தனிநபர் வாகன இறக்குமதிகளுக்கு அண்மையில் விதிக்கப்பட்ட 50 சதவீத கூடுதல் கட்டணம் தொடர்பாக விளக்கமளித்த அவர், இது தற்காலிக நடவடிக்கையாக மட்டுமே அறிமுகப்படுத்தப்பட்டதாக கூறினார்.

அமெரிக்க டாலரின் உயர்ந்த மதிப்பால் உருவாகும் அழுத்தத்தை குறைக்கும் நோக்கில், சில மாதங்களுக்கு தனிநபர் வாகன இறக்குமதிகளை தாமதப்படுத்தும் முயற்சியாகவே இந்த நடவடிக்கை மேற்கொள்ளப்பட்டதாகவும் அவர் விளக்கினார்.

இந்த கூடுதல் கட்டணம் வாகன இறக்குமதிகளை முற்றிலும் தடை செய்வதற்காக அல்ல என்றும், அதனை தவறாக புரிந்துகொள்ள வேண்டாம் என்றும் அமைச்சர் வலியுறுத்தினார்.

மேலும், இந்தக் கொள்கை காரணமாக வாகன விலைகள் தானாகவே 50 சதவீதம் அதிகரிக்கும் என சிலர் தவறாக கருதியுள்ளதாகவும் அவர் குறிப்பிட்டார்.

“வாகனங்கள் மிகைப்படுத்தப்பட்ட விலைகளில் விற்பனை செய்யப்படுவதாகவும், சரியான தகவல் இல்லாத காரணத்தால் வாங்குபவர்கள் அந்த விலைகளை செலுத்துவதாகவும் எங்களுக்கு தகவல்கள் கிடைத்துள்ளன” என அவர் தெரிவித்தார்.

அந்நியச் செலாவணி அழுத்தங்களை சமாளிப்பதில் உண்மைத் தகவல்களை அடிப்படையாகக் கொண்ட பொருளாதாரக் கொள்கைகளை முன்னெடுக்கவே அரசாங்கம் செயல்பட்டு வருவதாகவும், தவறான தகவல்கள் மற்றும் ஊகங்கள் வாகன சந்தையையும் நாட்டின் பொருளாதாரத்தையும் பாதிக்கக்கூடும் என்றும் அவர் எச்சரித்தார்.