நல்லூரில் தொடர் போராட்டம் - இன்று ஐ.நா. அலுவலகம் நோக்கி பேரணி

தியாக தீபம் திலீபனின் சிலை அகற்றப்பட்டமையைக் கண்டித்தும், அந்தச் சிலையை மீண்டும் அதே இடத்தில் நிறுவுமாறு வலியுறுத்தியும் நல்லூரில் ஆரம்பிக்கப்பட்டுள்ள தொடர் போராட்டம் இன்று (02) மூன்றாவது நாளாகவும் முன்னெடுக்கப்பட்டு வருகிறது.

திலீபனின் சிலை அகற்றப்பட்டமைக்கு எதிர்ப்புத் தெரிவித்து, கடந்த 30ஆம் திகதி முதல் நல்லூரில் தியாக தீபம் ஏற்றி இந்தத் தொடர் போராட்டம் முன்னெடுக்கப்பட்டு வருகின்றது.

சிலையை மீண்டும் அதே இடத்தில் நிறுவ வேண்டும் என வலியுறுத்தி முன்னெடுக்கப்பட்டு வரும் போராட்டத்தில் பல்வேறு தரப்பினரும் பங்கேற்று தமது எதிர்ப்பை வெளிப்படுத்தி வருகின்றனர்.

இந்நிலையில், போராட்டம் இன்று மாலை பேரணியாக முன்னெடுக்கப்படவுள்ளதாக ஏற்பாட்டாளர்கள் தெரிவித்துள்ளனர்.

நல்லூரில் இருந்து பேரணியாகச் சென்று, யாழ்ப்பாணத்தில் அமைந்துள்ள ஐக்கிய நாடுகள் சபையின் அலுவலகத்தில் மகஜர் ஒன்றைக் கையளித்த பின்னர் போராட்டம் நிறைவடையவுள்ளதாக தெரிவிக்கப்பட்டுள்ளது.

இதேவேளை, நல்லூரில் அமைந்துள்ள தியாக தீபம் திலீபனின் நினைவிடத்தில் இன்று பாடசாலை மாணவர்களும் அஞ்சலி செலுத்தினர்.

மாணவர்கள் மலர் தூவி, தீபமேற்றி தியாக தீபம் திலீபனுக்கு அஞ்சலி செலுத்தியதுடன், அவரது நினைவை முன்னிறுத்தி தமது மரியாதையையும் வெளிப்படுத்தினர்.