சனத் நிஷாந்தவின் வெற்றிடத்துக்கு ஜகத் பிரியங்கர நியமிக்கப்படுகிறார்

இராஜாங்க அமைச்சர் சனத் நிஷாந்தவின் நாடாளுமன்ற உறுப்பினர் பதவி வெற்றிடமாகியுள்ளதை தொடர்ந்து பொதுஜன பெரமுனவின் நாடாளுமன்ற உறுப்பினராக ஜகத் பிரியங்கர நியமிக்கப்படவுள்ளார் என தெரிவிக்கப்படுகிறது.

2020 ஆம் ஆண்டு இடம்பெற்ற பொதுத் தேர்தலின் பெறுபேறுகளின் பிரகாரம், ஸ்ரீ லங்கா பொதுஜன பெரமுனவில் புத்தளம் மாவட்டத்தில் விருப்பு வாக்குகளை பெற்றுக்கொண்ட வேட்பாளர்களின் பட்டியலில் சனத் நிஷாந்தவுக்கு அடுத்தபடியாக ஜகத் பிரியங்கர உள்ளார். இவர் 45,272 வாக்குகளைப் பெற்றுக்கொண்டார்.

2020 ஆம் ஆண்டு இடம்பெற்ற பொதுத்தேர்தலில் ஸ்ரீ லங்கா பொதுஜன பெரமுனவுக்கு புத்தளம் மாவட்டத்துக்கு ஐந்து ஆசனங்கள் கிடைக்கப் பெற்றன.

அருந்திக பெர்னாண்டோ, சிந்தக்க அமல் மாயாதுன்ன, பியங்கர ஜயரத்ன, அசோக பியந்த, சனத் நிஷாந்த ஆகியோர் நாடாளுமன்ற உறுப்பினர்களாக தெரிவு செய்யப்பட்டனர்.

ஸ்ரீ லங்கா பொதுஜன பெரமுன சார்பில் புத்தளம் மாவட்டத்தில் போட்டியிட்ட சனத் நிஷாந்த 80,082 வாக்குகளைப் பெற்று நாடாளுமன்ற உறுப்பினராக தெரிவு செய்யப்பட்டார்.

நீர் வழங்கல் இராஜாங்க அமைச்சராக அவர் பதவி வகித்தார். கட்டுநாயக்க அதிவேக நெடுஞ்சாலையில் இன்று அதிகாலை 2 மணியளவில் இடம்பெற்ற வாகன விபத்தில் சனத் நிஷாந்த உள்ளிட்ட இருவர் உயிரிழந்தனர்.