இன்று 4ஆம் ரந்தோலி பெரஹெர - விஷேட போக்குவரத்து திட்டம் அமுலுக்கு

கண்டி ஸ்ரீ தலதா மாளிகையின் வரலாற்றுச் சிறப்புமிக்க எசல பெரஹெரா விழாவின் 4ஆவது ரந்தோலி பெரஹெரா இன்று (26) வீதி உலா வரவுள்ளது.

இதனை முன்னிட்டு கண்டி நகரில் விசேட பாதுகாப்பு மற்றும் போக்குவரத்துத் திட்டங்கள் அமுல்படுத்தப்படவுள்ளதாக பொலிஸார் தெரிவித்துள்ளனர்.

ஆண்டுதோறும் ஸ்ரீ தலதா மாளிகையினால் நடத்தப்படும் எசல பெரஹெரா விழா இம்முறை ஓகஸ்ட் 18ஆம் திகதி ஆரம்பமாகி, ஓகஸ்ட் 28ஆம் திகதி வரை நடைபெறுகிறது.

பெரஹெரா காலத்தை முன்னிட்டு வீதித் தடைகள், பாதுகாப்பு கடமைகள், வாகனங்கள் மற்றும் நபர்களை சோதனையிடுதல், சுற்றுலாப் பயணிகளுக்கு வழிகாட்டுதல் மற்றும் வாகன நிறுத்துமிடங்களை ஏற்பாடு செய்தல் உள்ளிட்ட பல்வேறு விசேட நடவடிக்கைகள் முன்னெடுக்கப்பட்டுள்ளன.

இன்றைய 4ஆவது ரந்தோலி பெரஹெராவின் பாதை

இன்று மாலை 6.44 மணிக்கு மாளிகையிலிருந்து ஆரம்பமாகும் பெரஹெரா, தலதா வீதி, யடினுவர வீதி, குறுக்கு வீதி, கொட்டுகொடெல்ல வீதி, கந்தே வீதி, டி.எஸ். சேனாநாயக்க வீதி மற்றும் ரஜ வீதி வழியாகச் சென்று மீண்டும் மாளிகையை அடையவுள்ளது.

பெரஹெரா பயணிக்கும் பாதையின் மொத்த தூரம் 2 கிலோமீற்றர் 180 மீற்றர் என பொலிஸார் தெரிவித்துள்ளனர்.

மாற்று போக்குவரத்து ஏற்பாடுகள்

பெரஹெரா நடைபெறும் காலப்பகுதியில் கண்டி நகருக்குள் வாகனப் போக்குவரத்துக்காக பல்வேறு மாற்றுப் பாதைகள் அறிமுகப்படுத்தப்பட்டுள்ளன.

கட்டுகஸ்தோட்டையிலிருந்து கண்டி நகரை நோக்கி வரும் கனரக வாகனங்கள், மஹையாவ சந்தியிலிருந்து திலக் ரத்நாயக்க மாவத்தை வழியாக பொலிஸ் சந்தியை அடைந்து கண்டி நகரை நோக்கி பயணிக்க முடியும்.

அதே திசையிலிருந்து வரும் இலகுரக வாகனங்கள், டி.எஸ். சேனாநாயக்க வீதி, குறுக்கு வீதி மற்றும் யடினுவர வீதி வழியாகச் சென்று திலக் ரத்நாயக்க மாவத்தை பயன்படுத்த முடியும்.

கட்டுகஸ்தோட்டை நோக்கிச் செல்லும் வாகனங்கள் பொலிஸ் சந்தியிலிருந்து திலக் ரத்நாயக்க மாவத்தை வழியாக மஹையாவ திசையை நோக்கிப் பயணிக்க முடியும்.

தென்னேகும்புர மற்றும் அம்பிட்டிய திசைகளிலிருந்து வரும் வாகனங்கள் சங்கராஜ மாவத்தை, வேல்ஸ் பார்க் சந்தி மற்றும் எஹாலேபொல குமாரிஹாமி மாவத்தை வழியாகப் பயணிக்க முடியும்.

மேலும், ராஜபிஹில்ல மாவத்தை சந்தியிலிருந்து தேவாலயம் வீதி (Church Street) வழியாக கண்டி நகருக்குள் நுழைய முடியும்.

நகரிலிருந்து அம்பிட்டிய மற்றும் தெல்தெனிய திசைகளை நோக்கிப் பயணிக்கும் வாகனங்கள் கடிகாரக் கோபுர சுற்றுவட்டத்திலிருந்து தலதா வீதி வழியாகச் சென்று, சங்கராஜ மாவத்தை ஊடாகப் பயணிக்க முடியும்.

போகம்பரை சுற்றுவட்டம், எஹாலேபொல குமாரிஹாமி மாவத்தை, ராஜபிஹில்ல மாவத்தை மற்றும் வேல்ஸ் பார்க் சந்தி ஊடாகவும் சங்கராஜ மாவத்தை வழியாக அம்பிட்டிய மற்றும் தென்னேகும்புர திசைகளுக்குச் செல்ல முடியும்.

தேவாலயம் வீதி இருவழிப் போக்குவரத்திற்கும் பயன்படுத்தப்படும் வகையில் ஏற்பாடுகள் செய்யப்பட்டுள்ளன.

அத்துடன், கொழும்பு திசையிலிருந்து கண்டி நகருக்குள் நுழைவதற்கும், கண்டியிலிருந்து கொழும்பு நோக்கிச் செல்வதற்கும் வில்லியம் கோபல்லவ மாவத்தை மற்றும் பழைய பேராதனை வீதி ஆகிய இரு வீதிகளும் இருவழிப் போக்குவரத்திற்காக பயன்படுத்தப்படவுள்ளன.

பெரஹெரா நடைபெறும் நேரத்தில் வாகன நெரிசலைத் தவிர்க்கும் வகையில், சாரதிகள் மாற்றுப் பாதைகளைப் பயன்படுத்துவதுடன், பொலிஸாரின் போக்குவரத்து அறிவுறுத்தல்களுக்கு ஒத்துழைக்குமாறும் கேட்டுக்கொள்ளப்பட்டுள்ளனர்.