இலங்கையின் பொருளாதார பாய்ச்சலுக்கு வழிவிடுகிறதா சர்வதேச நாணய நிதியம்?

இலங்கை விரும்பும் பொருத்தமான எந்தவொரு வழியிலும் நாட்டுக்கு ஆதரவளிக்க சர்வதேச நாணய நிதியம் (IMF) தயாராக இருப்பதாக அதன் ஆசிய மற்றும் பசிபிக் திணைக்களத்தின் துணைப் பணிப்பாளர் சொனாலி ஜெயின்-சந்திரா தெரிவித்துள்ளார்.

பெங்கொக்கில் நடைபெற்ற சர்வதேச நாணய நிதியத்தின் கூட்டத்தின்போது இடம்பெற்ற ஊடகவியலாளர் சந்திப்பில் கருத்துத் தெரிவித்த அவர், இலங்கையின் பேரண்டப் பொருளாதார நிலைமை பெருமளவில் முன்னேற்றமடைந்துள்ளதாகக் குறிப்பிட்டார்.

இலங்கையின் நிதிச் செயல்திறன் வலுவடைந்துள்ளதுடன், கடன் மறுசீரமைப்புப் பணிகளும் பெரும்பாலும் நிறைவடைந்துள்ளதாக அவர் சுட்டிக்காட்டினார். அத்துடன், ஆளுகை உள்ளிட்ட கட்டமைப்பு சார்ந்த முக்கிய துறைகளிலும் குறிப்பிடத்தக்க முன்னேற்றங்கள் ஏற்பட்டுள்ளதாகத் தெரிவித்தார்.

இதேவேளை, சர்வதேச நாணய நிதியத்தின் விரிவாக்கப்பட்ட நிதி வசதித் திட்டத்தின் (Extended Fund Facility – EFF) கீழ், ஏழாவது மீளாய்வு தொடர்பாக இந்த மாத தொடக்கத்தில் இலங்கையுடன் ஊழியர் மட்ட உடன்பாடு எட்டப்பட்டுள்ளதாகத் தெரிவிக்கப்பட்டுள்ளது.

இந்த உடன்பாட்டின் மூலம் இலங்கைக்கு சுமார் 345 மில்லியன் அமெரிக்க டொலர் நிதியுதவி கிடைக்க வழிவகை ஏற்பட்டுள்ளது.

குறித்த மீளாய்வு நிறைவடைந்து, சர்வதேச நாணய நிதியத்தின் நிர்வாகக் குழுவின் ஒப்புதல் கிடைத்த பின்னர், இலங்கைக்கு சுமார் 345 மில்லியன் அமெரிக்க டொலர்களுக்குச் சமமான சிறப்பு வரைபட உரிமைகள் (SDR) வழங்கப்படும் என எதிர்பார்க்கப்படுகிறது.

இந்த உடன்படிக்கை எதிர்வரும் வாரங்களில் சர்வதேச நாணய நிதியத்தின் நிர்வாகக் குழுவின் பரிசீலனைக்கு எடுத்துக்கொள்ளப்படும் என சொனாலி ஜெயின்-சந்திரா தெரிவித்துள்ளார்.

மேலும், நிதியுதவித் திட்டம் நிறைவடைவதற்கு முன்னர், அடுத்தகட்ட மீளாய்வை மேற்கொள்வதற்காக மற்றொரு குழு இலங்கைக்கு விஜயம் செய்யும் எனவும் அவர் குறிப்பிட்டார்.

இதற்கு மேலதிகமாக, இலங்கை அதிகாரிகளுடன் தொடர்ந்து இணைந்து செயற்பட சர்வதேச நாணய நிதியம் தயாராக இருப்பதாகவும் அவர் தெரிவித்தார்.

இதன்படி, எதிர்காலத்தில் புதிய நிதி ஏற்பாடுகள், பொருளாதாரக் கொள்கைகள் தொடர்பான ஆலோசனைகள், கண்காணிப்பு நடவடிக்கைகள் மற்றும் நிறுவனங்களின் திறன் மேம்பாடு உள்ளிட்ட பல்வேறு வழிகளில் இலங்கைக்கு ஆதரவளிக்க முடியும் என அவர் மேலும் சுட்டிக்காட்டினார்.