பிரிக்ஸ் அமைப்பில் சேர இலங்கையின் முயற்சிக்கு பின்னடைவு

இந்தியா தலைமையில் நடைபெற்ற 18ஆவது பிரிக்ஸ் உச்சிமாநாடு செப்டம்பர் 12 மற்றும் 13ஆம் திகதிகளில் புதுடெல்லியில் நடைபெற்ற நிலையில், பிரிக்ஸ் அமைப்பில் இணைவதற்கான இலங்கையின் முயற்சி மீண்டும் கவனம் பெற்றுள்ளது.

“மீள்திறன், புத்தாக்கம், ஒத்துழைப்பு மற்றும் நிலைத்தன்மையை உருவாக்குதல்” என்ற தொனிப்பொருளில் நடைபெற்ற இந்த உச்சிமாநாட்டில், ஐக்கிய நாடுகள் சபை மற்றும் சர்வதேச நாணய நிதியத்தின் சீர்திருத்தம், உள்நாட்டு நாணயப் பரிவர்த்தனைகள், டிஜிட்டல் பொது உட்கட்டமைப்பு, காசா மோதல் உள்ளிட்ட பல்வேறு சர்வதேச விவகாரங்கள் தொடர்பில் தலைவர்கள் கலந்துரையாடினர்.

இதன்போது 140 பந்திகளைக் கொண்ட “புதுடெல்லி பிரகடனம்” ஒருமனதாக ஏற்றுக்கொள்ளப்பட்டது. அத்துடன், பிரிக்ஸ் அமைப்பின் 20ஆவது ஆண்டு நிறைவும் இந்த உச்சிமாநாட்டில் குறிக்கப்பட்டது.

11 முழு உறுப்புநாடுகளின் பிரதிநிதிகள் கலந்துகொண்ட இந்த மாநாட்டில், இந்தியப் பிரதமர் நரேந்திர மோடி, ரஷ்ய ஜனாதிபதி விளாடிமிர் புடின் மற்றும் சீன ஜனாதிபதி ஷி ஜின்பிங் உள்ளிட்ட தலைவர்கள் பங்கேற்றனர். பிரேசில் மற்றும் சவூதி அரேபியா ஆகிய நாடுகள் வெளியுறவு அமைச்சர் மட்டத்திலான பிரதிநிதிகளை அனுப்பியிருந்தன.

மேலும், 2024ஆம் ஆண்டு கசான் உச்சிமாநாட்டில் கூட்டாளர் அந்தஸ்து வழங்கப்பட்ட பெலாரஸ், பொலிவியா, கியூபா, கஜகஸ்தான், மலேசியா, நைஜீரியா, தாய்லாந்து, உகாண்டா, உஸ்பெகிஸ்தான் மற்றும் வியட்நாம் ஆகிய நாடுகளும் திறந்த அமர்வில் பங்கேற்றன. எனினும், இந்த மாநாட்டில் புதிய முழு உறுப்பினர்கள் அல்லது கூட்டாளர் நாடுகள் தொடர்பான அறிவிப்பு எதுவும் வெளியாகவில்லை.

பிரிக்ஸ் தொடர்பில் இலங்கைக்கு பின்னடைவு

இந்நிலையில், பிரிக்ஸ் அமைப்பில் இலங்கை இன்னும் முழு உறுப்பினர் அல்லது கூட்டாளர் நாடாக இடம்பெறவில்லை. இதனால் புதுடெல்லி உச்சிமாநாட்டில் இலங்கையின் பங்கேற்பும் மட்டுப்படுத்தப்பட்டதாக அமைந்தது.

2024ஆம் ஆண்டு ரஷ்யாவின் கசான் நகரில் நடைபெற்ற பிரிக்ஸ் உச்சிமாநாட்டின்போது, புதிய அபிவிருத்தி வங்கியின் முழு உறுப்புரிமை மற்றும் பிரிக்ஸ் உறுப்புரிமைக்காக இலங்கை அதிகாரப்பூர்வமாக விண்ணப்பித்திருந்தது.

எனினும், இலங்கையின் விண்ணப்பம் இதுவரை நிராகரிக்கப்படவில்லை எனத் தெரிவிக்கப்படுவதுடன், புதிய உறுப்பினர்களை இணைப்பது தொடர்பான நடைமுறைகளுக்கு அமைய மேலதிக பரிசீலனைக்காக ஒத்திவைக்கப்பட்டுள்ளதாகக் கூறப்படுகிறது.

இதனிடையே, ஏனைய வளரும் நாடுகள் பிரிக்ஸ் கூட்டாண்மை கட்டமைப்பில் முன்னேறி வரும் நிலையில், இலங்கை இந்த வாய்ப்பை இழந்தமை இராஜதந்திர ரீதியிலான பின்னடைவாக விமர்சகர்களால் சுட்டிக்காட்டப்படுகிறது.

பிரிக்ஸ் போன்ற சர்வதேச அமைப்புகளில் இணைவதற்கு அரசியல் விருப்பம் அல்லது விண்ணப்பம் மாத்திரம் போதாது எனவும், இலங்கையின் பொருளாதார மற்றும் மூலோபாய முக்கியத்துவத்தை வலியுறுத்தும் வகையில் தொடர்ச்சியான இராஜதந்திர நடவடிக்கைகள் அவசியம் எனவும் விமர்சகர்கள் தெரிவிக்கின்றனர்.

மீண்டும் விண்ணப்பிக்க அமைச்சரவை அனுமதி

இந்தப் பின்னணியில், பிரிக்ஸ் உறுப்புரிமையையும் புதிய அபிவிருத்தி வங்கிக்கான அணுகலையும் மீண்டும் கோருவதற்கு இலங்கை அமைச்சரவை செப்டம்பர் 14ஆம் திகதி அனுமதி வழங்கியுள்ளது.

அடுத்த பிரிக்ஸ் தலைமைப் பொறுப்பை சீனா ஏற்கவுள்ள நிலையில், இலங்கை தனது உறுப்புரிமை முயற்சியை மீண்டும் தீவிரப்படுத்தியுள்ளமை குறிப்பிடத்தக்கது.

பிரிக்ஸ் அமைப்பில் இணைவது இலங்கைக்கு புதிய பொருளாதார வாய்ப்புகள், சர்வதேச ஒத்துழைப்பு மற்றும் புதிய அபிவிருத்தி வங்கியின் நிதி வாய்ப்புகளைப் பெறுவதற்கான வழிகளைத் திறக்கக்கூடும் என்பதால், எதிர்காலத்தில் இலங்கையின் இராஜதந்திர முயற்சிகள் முக்கியத்துவம் பெறும் என எதிர்பார்க்கப்படுகிறது.