திரையரங்குகளை அதிரவைக்கும் ‘ஜெயிலர் 2’

சூப்பர் ஸ்டார் ரஜினிகாந்த் நடிப்பில் வெளியாகியுள்ள ‘ஜெயிலர் 2’ திரைப்படம், திரையரங்குகளில் வெளியான ஐந்து நாட்களிலேயே பல்வேறு வசூல் சாதனைகளைப் படைத்து வருவதாகத் தகவல்கள் தெரிவிக்கின்றன.

இந்த ஆண்டின் அதிக வசூல் செய்த தமிழ் திரைப்படம் என்ற பெருமையைப் பெற்றுள்ள இப்படம், இந்திய அளவில் அதிக வசூல் செய்த படங்களின் பட்டியலில் ஐந்தாவது இடத்தையும் பிடித்துள்ளதாகக் கூறப்படுகிறது.

இந்நிலையில், ‘ஜெயிலர் 2’ படத்தின் வசூல் வரவேற்பு குறித்து பிவிஆர் ஐநாக்ஸ் நிறுவனத்தின் நிர்வாக இயக்குநர் சஞ்சீவ் குமார் பிஜிலி கருத்துத் தெரிவித்துள்ளார்.

இதுகுறித்து அவர் கூறுகையில், “13 லட்சத்திற்கும் அதிகமான பார்வையாளர்களை ஈர்த்து, வலுவான தொடக்க வார இறுதியைப் பதிவு செய்துள்ள ‘ஜெயிலர் 2’ திரைப்படம், ரஜினிகாந்தின் ஈடுஇணையற்ற நட்சத்திர அந்தஸ்துக்கும், ரசிகர்களைக் கவரும் சினிமாவுக்கும் சான்றாக அமைந்துள்ளது.

இதுபோன்ற திரைப்படங்கள் பெரிய திரையில் மட்டுமே சாத்தியமாகும் வகையில் ரசிகர்களை ஒன்றிணைக்கின்றன. இது திரையரங்க அனுபவத்தின் நீடித்த வலிமையை மீண்டும் உறுதிப்படுத்துகிறது. ‘ஜெயிலர் 2’ படத்தின் வரவேற்பு எங்களுக்கு ஊக்கமளிக்கிறது. மேலும், அதிக எண்ணிக்கையிலான ரசிகர்களைத் திரையரங்குகளுக்கு ஈர்க்கும் வலுவான கதையம்சம் கொண்ட படங்களின் மீது நாங்கள் தொடர்ந்து நம்பிக்கை கொண்டுள்ளோம்” என்றார்.

டைகர் முத்துவேல் பாண்டியனாக மீண்டும் களமிறங்கும் ரஜினி

நெல்சன் திலீப்குமார் இயக்கத்தில் உருவாகியுள்ள ‘ஜெயிலர் 2’ திரைப்படத்தில், ரஜினிகாந்த் மீண்டும் டைகர் முத்துவேல் பாண்டியன் கதாபாத்திரத்தில் நடித்துள்ளார். முதல் பாகத்தில் வர்மன் தலைமையிலான கும்பலுக்குப் பின்னணியில் செயல்பட்ட மிகப்பெரிய சிலைக் கடத்தல் கும்பலை வீழ்த்தும் நோக்கத்துடன் அவர் களமிறங்குவதே இப்படத்தின் கதைக்களமாக அமைந்துள்ளது.

இப்படத்தில் ரஜினிகாந்துடன் மோகன்லால், சிவராஜ்குமார், மிதுன் சக்கரவர்த்தி, வித்யா பாலன், எஸ்.ஜே. சூர்யா, சுராஜ் வெஞ்சாரமூடு, ரம்யா கிருஷ்ணன், மிர்னா மேனன், யோகி பாபு உள்ளிட்ட பலர் முக்கிய கதாபாத்திரங்களில் நடித்துள்ளனர்.

ரஜினிகாந்தின் அதிரடி நடிப்பும், நட்சத்திரப் பட்டாளமும் இணைந்துள்ள ‘ஜெயிலர் 2’ திரைப்படம் தொடர்ந்து ரசிகர்களின் கவனத்தை ஈர்த்து வருகிறது.