ஜனாதிபதித் தேர்தலில் போட்டியிட 39 பேர் தகுதி

வரும் ஜனாதிபதித் தேர்தலில் போட்டியிடுவதற்காகக் கட்டுப்பணம் செலுத்திய 40 வேட்பாளர்களில் 39 பேர் தமது வேட்புமனுக்களை இன்று சமர்ப்பித்துள்ளனர் எனவும், அவர்கள் 39 பேரும் தேர்தலில் போட்டியிடத் தகுதி பெற்றுள்ளனர் எனவும் தேர்தல்கள் ஆணைக்குழுவின் தலைவர் ஆர்.எம்.ஏ.எல்.ரத்நாயக்க தெரிவித்தார்.

இதேவேளை, சுயேச்சை வேட்பாளர் சரத் குமார குணரத்ன வேட்புமனுப் பத்திரத்தைச் சமர்ப்பிக்கவில்லை எனவும் அவர் குறிப்பிட்டார்.

இன்று காலை 9 மணி முதல் முற்பகல் 11 மணி வரையில் இராஜகிரியவில் உள்ள தேர்தல்கள் ஆணைக்குழுவில் ஜனாதிபதித் தேர்தலுக்கான வேட்புமனுக்கள் ஏற்றுக்கொள்ளப்பட்டன. அதன்பின்னர் நடைபெற்ற ஊடக சந்திப்பின்போதே தேர்தல்கள் ஆணைக்குழுவின் தலைவர் மேற்கண்டவாறு கூறினார்.