செம்மணி மனிதப் புதைகுழி விவகாரம் - சர்வதேச குற்றவியல் விசாரணைக்கு அரசு இணங்க வேண்டும்

செம்மணி மனிதப் புதைகுழி விவகாரத்தில் உண்மைகளை வெளிக்கொணர வேண்டுமெனில், உள்ளக விசாரணைகள் மாத்திரம் போதாது. இலங்கை அரசு சர்வதேச குற்றவியல் விசாரணைக்கு இணங்க வேண்டும் என்று தமிழ்த் தேசிய மக்கள் முன்னணியின் தலைவரும் யாழ்ப்பாணம் மாவட்ட நாடாளுமன்ற உறுப்பினருமான கஜேந்திரகுமார் பொன்னம்பலம் வலியுறுத்தியுள்ளார்.

முன்னாள் ஜனாதிபதி கோட்டாபய ராஜபக்ஷவினால் கிழக்கு மாகாணத் தொல்லியல் தொடர்பான குழுவில் பேராசிரியர் ராஜ் சோமதேவா நியமிக்கப்பட்டமை மற்றும் செம்மணி மனிதப் புதைகுழி தொடர்பான அவரது அறிக்கை குறித்து கேள்வி எழுப்பிய அவர், ராஜ் சோமதேவா ஒரு குறிப்பிட்ட நிகழ்ச்சி நிரலின் அடிப்படையில் செயற்படுவதாகவும் குற்றஞ்சாட்டினார்.

நாடாளுமன்றத்தில் நேற்று வியாழக்கிழமை நடைபெற்ற நச்சு, அபின் மற்றும் அபாயகரமான ஒளடதங்கள் திருத்தச் சட்டமூலம் மீதான விவாதத்தில் உரையாற்றும்போதே அவர் இவ்வாறு தெரிவித்தார்.

ராஜ் சோமதேவாவின் அறிக்கையில் முரண்பாடுகள் உள்ளனவா?

செம்மணி மனிதப் புதைகுழி தொடர்பாகப் பேராசிரியர் ராஜ் சோமதேவா வெளியிட்ட அறிக்கையின் 17ஆவது பக்கத்தில், சுகாதார விபத்து ஒன்றினால் கணிசமான எண்ணிக்கையிலானோர் உயிரிழந்து புதைக்கப்பட்ட சம்பவத்துடன் செம்மணியில் கண்டறியப்பட்டுள்ள புதைகுழி ஒத்துப்போவதாகவும், அந்தச் சாத்தியக்கூற்றை நிராகரிப்பதற்குக் காரணம் இல்லை என்றும் குறிப்பிடப்பட்டுள்ளதாகக் கஜேந்திரகுமார் பொன்னம்பலம் சுட்டிக்காட்டினார்.

அதேவேளை, இதுவரை கண்டறியப்பட்ட உடல்கள் தொடர்பில் நிபுணத்துவக் குறைபாடுகள் உள்ளிட்ட காரணங்களால் மேலதிக ஆய்வுகள் தேவைப்படுவதால், இறுதி முடிவுகளை அறிவிக்க முடியாது என்றும் அந்த அறிக்கையில் குறிப்பிடப்பட்டுள்ளதாக அவர் தெரிவித்தார்.

இறுதி முடிவுகளை அறிவிக்க முடியாது எனக் கூறும் அதே அறிக்கையில், சுகாதார விபத்து தொடர்பான சாத்தியக்கூறு வலியுறுத்தப்படுவது எந்த அடிப்படையில் என அவர் கேள்வி எழுப்பினார்.

மேலும், 17 பக்கங்களைக் கொண்ட அறிக்கையில் குறித்த விபத்தை உறுதிப்படுத்தும் ஆதாரங்கள் முன்வைக்கப்படாத நிலையில், அத்தகைய முடிவை வலியுறுத்துவது அறிக்கையின் நோக்கம் தொடர்பில் சந்தேகங்களை ஏற்படுத்துவதாகவும் அவர் குறிப்பிட்டார்.

முன்னைய அறிக்கைகள் குறித்தும் சுட்டிக்காட்டு

பேராசிரியர் ராஜ் சோமதேவா இதற்கு முன்னரும் மூன்று அறிக்கைகளை வெளியிட்டு, அவற்றில் தனது தனிப்பட்ட முடிவுகளைப் பதிவு செய்துள்ளதாகக் கஜேந்திரகுமார் பொன்னம்பலம் தெரிவித்தார். முதலாவது அறிக்கையில் செம்மணி தொடர்பில் பாரிய புதைகுழி எனக் குறிப்பிடப்பட்டிருந்ததாகவும் அவர் கூறினார்.

மேலும், 1999ஆம் ஆண்டு ராஜன் ஹூல் வெளியிட்ட அறிக்கையில், செம்மணியில் உடல்கள் ஆடைகளின்றிப் புதைக்கப்பட்டமை தொடர்பான தகவல்கள் இடம்பெற்றிருந்ததாகவும், திட்டமிட்ட படுகொலைகளுக்குப் பின்னர் முகாம்களிலிருந்து கொண்டுசெல்லப்பட்டவர்கள் அங்கு புதைக்கப்பட்டதாக அவர் சுட்டிக்காட்டியிருந்ததாகவும் கஜேந்திரகுமார் தெரிவித்தார்.

செம்மணி விவகாரம் தொடர்பில் இலங்கை மனித உரிமைகள் ஆணைக்குழுவும் அறிக்கை வெளியிட்டுள்ளதாக அவர் நினைவுபடுத்தினார்.

கோட்டாபய ராஜபக்ஷவின் தொல்லியல் குழுவில் ராஜ் சோமதேவா

முன்னாள் ஜனாதிபதி கோட்டாபய ராஜபக்ஷ கிழக்கு மாகாணத்தில் தொல்லியல் தொடர்பான குழுவை அமைத்தபோது, பேராசிரியர் ராஜ் சோமதேவாவையும் அதில் உறுப்பினராக நியமித்திருந்தார் எனக் கஜேந்திரகுமார் பொன்னம்பலம் குறிப்பிட்டார்.

ராஜ் சோமதேவா சிங்கள பௌத்த தேசியவாதப் பின்னணியைக் கொண்டவர் என்றும், அவரது கடந்தகாலச் செயற்பாடுகளையும் தற்போதைய செம்மணி அறிக்கையையும் கருத்திற்கொள்ளும்போது, அவர் ஒரு குறிப்பிட்ட நிகழ்ச்சி நிரலுடன் செயற்படுவதாகத் தமது தரப்பு கருதுவதாகவும் அவர் தெரிவித்தார்.

சர்வதேச விசாரணையே உண்மையை வெளிக்கொணரும்

செம்மணி மனிதப் புதைகுழி தொடர்பான விசாரணைகளை இலங்கைக்குள் மாத்திரம் முன்னெடுப்பதன் மூலம் முழுமையான உண்மைகளை வெளிக்கொணர முடியாது எனத் தமது தரப்பு தொடர்ச்சியாக வலியுறுத்தி வருவதாகக் கஜேந்திரகுமார் பொன்னம்பலம் கூறினார்.

இந்த விவகாரத்தில் அரசு நேர்மையாகச் செயற்பட விரும்பினால், சர்வதேச குற்றவியல் விசாரணைக்கு இணங்க வேண்டும் என்றும் அவர் வலியுறுத்தினார்.

குறித்த படுகொலைகள் தனிநபர்களால் மாத்திரம் மேற்கொள்ளப்பட்டவை அல்ல என்பதால், சர்வதேச விசாரணையின்றி உண்மைகளைக் கண்டறிவது கடினம் எனவும் அவர் தெரிவித்தார்.

செம்மணியில் கண்டறியப்பட்ட உடல்கள் குறித்து கவலை

செம்மணியில் இதுவரை சுமார் 600 உடல்கள் கண்டறியப்பட்டுள்ளதாகவும், மேலும் 600 உடல்கள் இருக்கக்கூடும் எனக் குறிப்பிடப்படுவதாகவும் கஜேந்திரகுமார் பொன்னம்பலம் தெரிவித்தார்.

இவ்வளவு பாரதூரமான சம்பவம் தொடர்பில் அரசு உரிய அக்கறை செலுத்த வேண்டும் எனக் குறிப்பிட்ட அவர், தமது அரசாங்கம் இனவாதமற்றது என்றும், முந்தைய ஆட்சியாளர்களிலிருந்து வேறுபட்டது என்றும் நிரூபிக்க விரும்பினால், சர்வதேச குற்றவியல் விசாரணைக்கு முட்டுக்கட்டை போடாமல் அதற்கு இணங்க வேண்டும் எனவும் வலியுறுத்தினார்.