எதிர்கால AI-ஐ யார் நிறுத்துவார்கள்? ‘Kill Switch’ குறித்து உலகளவில் விவாதம்

செயற்கை நுண்ணறிவு (AI) வேகமாக வளர்ந்து வரும் நிலையில், பலரிடமும் எழும் முக்கியமான கேள்விகளில் இதுவும் ஒன்றாக மாறியுள்ளது.

மனிதர்களைவிட அதிக திறன் கொண்டதாக ஏ.ஐ. மாறி, தன்னிச்சையாகச் செயல்படத் தொடங்கினால் அதனை எவ்வாறு கட்டுப்படுத்துவது? எதிர்பாராத வகையில் மனிதர்களுக்கு எதிராகச் செயல்பட்டால், மின்சாதனத்தில் ‘ஆஃப்’ பட்டனை அழுத்துவது போன்று ஏ.ஐ.யையும் உடனடியாக செயலிழக்கச் செய்ய முடியுமா?

இதற்கான பதிலைத் தேடும் வகையில் தற்போது ‘ஏ.ஐ. கில் ஸ்விட்ச்’ (AI Kill Switch) என்ற கருத்து தீவிரமாக விவாதிக்கப்பட்டு வருகிறது.

ஒரு ஏ.ஐ. அமைப்பு ஆபத்தான முறையில் அல்லது எதிர்பாராத விதமாகச் செயல்படத் தொடங்கினால், அதன் செயல்பாட்டை அவசரமாக நிறுத்துவதற்கான பாதுகாப்பு அமைப்பே ‘கில் ஸ்விட்ச்’ என பொதுவாகக் குறிப்பிடப்படுகிறது.

ஒரே பட்டனில் ஏ.ஐ.யை நிறுத்த முடியுமா?

‘கில் ஸ்விட்ச்’ என்ற யோசனை அறிவியல் புனைகதை போன்றதாகத் தோன்றினாலும், இதன் சாத்தியக்கூறுகள் குறித்து அரசுகளும் தொழில்நுட்ப நிபுணர்களும் ஆராய்ந்து வருகின்றனர்.

அமெரிக்காவின் கலிபோர்னியா மாகாணத்திலும் அதிநவீன ஏ.ஐ. மாடல்களுக்கான அவசர நிறுத்து அல்லது ‘கில் ஸ்விட்ச்’ போன்ற பாதுகாப்பு ஏற்பாடுகள் குறித்து ஆய்வு செய்ய நிபுணர்களை ஈடுபடுத்தும் நடவடிக்கைகள் முன்னெடுக்கப்பட்டுள்ளன.

எனினும், “ஒரு சிவப்பு பட்டனை வைத்துவிட்டால் பிரச்சினை முடிந்துவிடும்” என்று கருத முடியாது.

காரணம், நவீன ஏ.ஐ. அமைப்புகள் ஒரு தனிப்பட்ட கணினியில் மட்டும் இயங்குவதில்லை. உலகின் பல்வேறு பகுதிகளில் அமைந்துள்ள தரவு மையங்கள், ஆயிரக்கணக்கான சேவையகங்கள், கணினிச் சில்லுகள் மற்றும் காப்பு அமைப்புகள் உள்ளிட்ட சிக்கலான கட்டமைப்புகளின் உதவியுடன் அவை இயங்குகின்றன.

இதனால், ஒரே இடத்தில் இருக்கும் ஒரு ஸ்விட்சை அழுத்தி முழுமையான ஏ.ஐ. அமைப்பையும் ஒரே நேரத்தில் முடக்குவது நடைமுறையில் சவாலானதாக இருக்கலாம்.

‘கில் ஸ்விட்ச்’ கூட ஆபத்தாக மாறுமா?

ஏ.ஐ.யை நிறுத்துவதற்காக மென்பொருளுக்குள் ரகசியமான ‘கில் ஸ்விட்ச்’ ஒன்றை உருவாக்கினாலும், அதில் வேறு ஒரு அபாயமும் காணப்படுகிறது.

அத்தகைய அவசர நிறுத்து அமைப்பைத் தாக்குதலாளர்கள் கண்டறிந்து தவறாகப் பயன்படுத்தினால், அதுவே புதிய பாதுகாப்பு அச்சுறுத்தலாக மாறக்கூடும்.

மேலும், மின்சாரம், நிதி, போக்குவரத்து உள்ளிட்ட முக்கியமான உள்கட்டமைப்புகளுடன் ஏ.ஐ. அமைப்புகள் அதிகளவில் இணைக்கப்படும் எதிர்கால சூழலில், ஒரு ஏ.ஐ. அமைப்பை அவசரமாக நிறுத்துவது பிற சேவைகளிலும் பாதிப்புகளை ஏற்படுத்தக்கூடும்.

பல அடுக்குப் பாதுகாப்பு தேவை

எனவே, ஏ.ஐ.யைக் கட்டுப்படுத்த ஒரே ஒரு ‘ஆஃப்’ பட்டனை உருவாக்குவதைவிட, பல அடுக்குகளைக் கொண்ட பாதுகாப்பு கட்டமைப்பே முக்கியமானதாகக் கருதப்படுகிறது.

இதில் ஏ.ஐ. நிறுவனங்களுக்கான பொதுவான பாதுகாப்பு விதிமுறைகள், நிபுணர்களின் தொடர்ச்சியான சோதனைகள், ஆபத்தான செயல்பாடுகளைக் கண்காணித்தல், அவசரகால நிறுத்த நடைமுறைகள் மற்றும் சுயாதீன மதிப்பீடுகள் போன்ற பல்வேறு நடவடிக்கைகள் இடம்பெறலாம்.

அதிநவீன ஏ.ஐ. அமைப்புகளை சுயாதீன ஆய்வாளர்கள் பரிசோதித்து, அவற்றில் காணப்படும் அபாயங்களை முன்கூட்டியே கண்டறிவதற்கான வாய்ப்புகளும் இதன் ஒரு பகுதியாக முன்வைக்கப்படுகின்றன.

எனவே, “ஏ.ஐ. மனிதர்களின் கட்டுப்பாட்டை மீறினால் அதை அழிக்க ஒரு பட்டன் தயாராகிவிட்டது” என்று இப்போதே கூற முடியாது. ஆனால், எதிர்காலத்தில் ஏ.ஐ. அமைப்புகள் எதிர்பாராத வகையில் செயல்படும் சூழ்நிலைகளை எவ்வாறு கையாள்வது என்பது தொடர்பில் அரசுகளும் தொழில்நுட்ப நிபுணர்களும் தீவிரமாகச் சிந்தித்து வருகின்றனர்.

ஒரு வாகனத்திற்கு வேகம் எவ்வளவு முக்கியமோ, அதே அளவுக்கு பிரேக்கும் முக்கியம். அதுபோலவே, வேகமாக வளர்ந்து வரும் ஏ.ஐ. தொழில்நுட்பத்துடன் இணைந்து, அதனை பாதுகாப்பாகக் கட்டுப்படுத்துவதற்கான ‘அவசர பிரேக்’ மற்றும் கடிவாளத்தையும் உருவாக்குவது எதிர்காலத்தின் முக்கிய தேவையாக மாறக்கூடும்.