உயிர்த்த ஞாயிறு தினம் இன்று : நாடு முழுவதும் உள்ள தேவாலயங்களில் பலத்த பாதுகாப்பு

உலகெங்கிலும் உள்ள கிறிஸ்தவ மக்கள் மிகுந்த பக்தியுடன் கொண்டாடும் உயிர்த்த ஞாயிறு தினம் இன்றாகும்.

இயேசு கிறிஸ்து மரணத்தை வென்று உயிர்த்தெழுந்ததை நினைவு கூரும் வகையில், இலங்கையிலும் கிறிஸ்தவ மக்கள் விசேட ஆராதனைகளில் ஈடுபட்டு வருகின்றனர்.

உலக மக்கள் அனைவரையும் பாவத்திலிருந்து மீட்பதற்காகச் சிலுவையில் தனது உயிரைத் தியாகம் செய்த இயேசு கிறிஸ்து, மூன்று நாட்களுக்குப் பிறகு உயிர்த்தெழுந்ததையே கிறிஸ்தவர்கள் உயிர்த்த ஞாயிறு பெருவிழாவாகக் கொண்டாடுகின்றனர்.

இதனுடன், இயேசுவின் துன்பப்படுதல் மற்றும் மரணத்தை நினைவு கூர்ந்து 40 நாட்கள் கடைப்பிடிக்கப்பட்டு வந்த தவக்காலமும் இன்றைய தினத்துடன் நிறைவடைகிறது.

எருசலேமின் கல்வாரி மலையில் சிலுவையில் அறையப்பட்ட இயேசு, இன்றைய தினத்தில் உயிர்த்தெழுந்து தனது சீடர்களுக்குக் காட்சியளித்ததாக விவிலியத்தில் குறிப்பிடப்பட்டுள்ளது.

உயிர்த்த ஞாயிறு பெருவிழாவை முன்னிட்டு, "அல்லேலூயா" சனிக்கிழமை நள்ளிரவு ஆராதனைகள் நேற்று இரவு அனைத்து தேவாலயங்களிலும் நடைபெற்றன.

கொழும்பு மறைமாவட்ட ஆயர் அதிவணக்கத்திற்குரிய மெல்கம் கர்தினால் ரஞ்சித் ஆண்டகை கலந்து கொண்ட விசேட ஆராதனை, கொட்டாஞ்சேனை புனித லூசியா கதீட்ரலில் இடம்பெற்றது.

இன்றைய தின திருப்பலிகளுக்காக நாடு முழுவதும் உள்ள தேவாலயங்களில் விசேட காவல்துறை பாதுகாப்பு வழங்க நடவடிக்கை எடுக்கப்பட்டுள்ளது.

இது குறித்துக் கருத்துத் தெரிவித்த தேசிய கத்தோலிக்க மக்கள் தொடர்பாடல் பணிப்பாளர் அருட்தந்தை ஜூட் கிரிசந்த பெர்னாண்டோ, பாதுகாப்பு நடவடிக்கைகளுக்காக முப்படை அதிகாரிகளும் ஈடுபடுத்தப்பட்டுள்ளதாகத் தெரிவித்தார்.

இதன் காரணமாக, கிறிஸ்தவ மக்கள் எவ்வித தேவையற்ற அச்சமுமின்றித் தமது மத வழிபாடுகளை மேற்கொள்ள முடியும் என அவர் மேலும் குறிப்பிட்டுள்ளார்.