இலங்கை வரலாற்றில் மாபெரும் சைபர் திருட்டு - CID உடன் கைகோர்த்த அமெரிக்க FBI அதிரடிப் படை

இலங்கை திறைசேரி நிதியிலிருந்து 2.5 மில்லியன் அமெரிக்க டாலர் இணையவழி மோசடி செய்யப்பட்ட சம்பவம் மற்றும் அமெரிக்க அஞ்சல் அதிகாரிகளுக்குச் செலுத்தப்பட வேண்டிய 6.25,000 டாலர் காணாமல் போன விவகாரம் தொடர்பாக விசாரணைகளுக்கு உதவ, அமெரிக்க கூட்டாட்சி புலனாய்வு அமைப்பான FBI-யின் விசேட குழு இலங்கைக்கு வந்துள்ளதாக தகவல்கள் தெரிவிக்கின்றன.

இந்த நிதி மோசடி அமெரிக்காவின் நிதி அமைப்புகள் வழியாக பல வங்கிக் கணக்குகளுக்கு மாற்றப்பட்டிருப்பது கண்டறியப்பட்டதைத் தொடர்ந்து, விசாரணை சர்வதேச மட்டத்திற்கு உயர்ந்துள்ளது.

அமெரிக்கத் தூதரக வளாகத்தில் ஏற்கனவே கலந்துரையாடல்கள் தொடங்கியுள்ளதுடன், குற்றப் புலனாய்வுத் திணைக்கள அதிகாரிகள் FBI அதிகாரிகளுடன் பல கட்ட விரிவான சந்திப்புகளை நடத்தியுள்ளதாக கூறப்படுகிறது.

திருடப்பட்ட நிதியின் டிஜிட்டல் தடயங்களை கண்டறியும் பணியில் FBI மற்றும் CID இணைந்து செயல்பட்டு வருகின்றன.

விசாரணைகளின் போது, Biz Solutions என்ற நிறுவனம் இந்த மோசடியில் பயன்படுத்தப்பட்டிருக்கலாம் என புலனாய்வாளர்கள் அடையாளம் கண்டுள்ளனர். இணையவழி வணிகப் பதிவு சேவைகளில் ஈடுபட்டதாகக் கூறப்படும் இந்த நிறுவனம் அமெரிக்காவின் டெலாவேர் மாநிலத்தில் பதிவு செய்யப்பட்டிருந்ததாக தெரிவிக்கப்பட்டுள்ளது.

இந்த இணையத் தாக்குதல் வெளிநாட்டு வளங்கள் துறையை குறிவைத்து மேற்கொள்ளப்பட்டதுடன், அதிகாரப்பூர்வ மின்னஞ்சல் தொடர்பு அமைப்புகளுக்கான அங்கீகரிக்கப்படாத அணுகலையும் உள்ளடக்கியிருந்தது.

ஆஸ்திரேலியாவிற்குச் செலுத்தப்பட வேண்டிய 22.9 மில்லியன் டாலர் கடன் திருப்பிச் செலுத்துதலுக்கான ஆறு கட்டணச் சீட்டுகளில் நான்கு, ஹேக்கர்களால் மாற்றித் திசைதிருப்பப்பட்டிருந்தது காவல்துறை விசாரணையில் தெரியவந்துள்ளது.

டெலாவேரில் பதிவு செய்யப்பட்ட நிறுவனம் வழியாக பணம் நகர்த்தப்பட்டிருந்தாலும், இறுதி பரிவர்த்தனைகளில் ஒன்று கடுமையான வங்கி விதிமுறைகள் அமலில் உள்ள மற்றொரு அமெரிக்க மாநிலத்துடன் தொடர்புடையதாக இருந்ததாகவும் கூறப்படுகிறது.

இந்த விசாரணைகளுக்கு முழுமையான ஒத்துழைப்பை வழங்க அமெரிக்க அதிகாரிகள் உறுதியளித்துள்ளதுடன், அமெரிக்காவில் வசிக்கும் சந்தேக நபர்கள் மீது சட்ட நடவடிக்கை எடுக்கத் தயாராக இருப்பதாகவும் தகவல்கள் தெரிவிக்கின்றன.

எனினும், திருடப்பட்ட பணம் எந்த இறுதி வங்கிக் கணக்குகளுக்குச் சென்றது என்பதை இன்னும் உறுதிப்படுத்த முடியவில்லை என புலனாய்வாளர்கள் ஒப்புக்கொண்டுள்ளனர்.

தேவையான தொழில்நுட்ப உதவிகளையும் டிஜிட்டல் தடயவியல் கருவிகளையும் CID-க்கு வழங்க FBI இணக்கம் தெரிவித்துள்ளதாகவும் கூறப்படுகிறது.