இரகசியம் - பரகசியம் (17.3.2025)

இன்று என் பத்தியில் வருவது என் சொந்தச் சரக்கு அல்ல. முகப் புத்தகத்தில் சுட்டது.

வாசிப்பதற்கு விடயம் பொதிந்ததாகத் தெரிந்தது, அதனால் வாசகர்களுடன் அதனைப் பகிரலாம் என்று கருதினேன். அத்ய் இதுதான்:-

தாங்கள் ஆட்சி அதிகாரத்துக்கு வந்தால் -

# மத்திய வங்கி கொள்ளை புகழ் அர்ஜுன் மகேந்திரனை 24 மணி நேரத்தில் நாட்டுக்கு கொண்டு வருவோம் என்று சொன்னார்கள்.

# உகண்டாவிற்குக் கொண்டு சென்ற காசைத் திரும்ப எம் நாட்டுக்கு கொண்டு வருவோம் என்று சொன்னார்கள்.

# ராஜபக்‌ஷவை வீட்டை விட்டுக் கலைப்போம் என்றார்கள்.

# எரிபொருள் விலையைக் குறைப்போம் என்றார்கள்.

# ஊழல்வாதிகளை ஒழிப்போம் என்றார்கள்.

# தாஜுதீன் கொலைக் குற்றவாளியை கைது செய்வோம் என்றார்கள்.

# ஈஸ்டர் குண்டுத்தாக்குதல் சூத்திரதாரியைக் கைது செய்வோம் என்றார்கள்.

# பார் பெர்மிட் எடுத்தவர்கள் பெயர் விவரம் வெளியிடுவோம் என்றார்கள்.

# அரிசிக்குக் கட்டுப்பட்டு விலை என்றார்கள்.

# VITZ கார் ரூ.12 இலட்சத்தில் கொண்டு வந்து தருவோம் என்றார்கள்.

# தங்களிடம் 500 பைல்கள் (கோவைகள்) இருக்கின்றன என்றார்கள்.

ஆனால் இப்போது -

# செவ்வந்தியையும் காணோம்,தேசபந்துவையும் கணோம்.

# இப்போது உள்ளூராட்சித் தேர்தலுக்கான புதிய வெளியீடு பட்டலந்த அறிக்கை

'இப்ப தானே வந்திருக்கிறோம். உடன பிள்ளை பெற முடியுமா?' என்று கேட்டார்கள். பிள்ளை பெறக் கூட 9 மாதங்கள் தேவைதானே...! இன்னும் பொறுத்திரு என்கிறார்கள். அதுக்குள்ளே எல்லா சபைகளையும் கைப்பற்றுவோம் என்று உளறுகிறார்கள். கேட்கிறவன் கேனையனா இருந்தா ….?

- என்று முடிகின்றது அந்த முகப்புத்தக விமர்சனப் பதிவு...!

அநுர குமார திஸ்நாயக்கா ஜனாதிபதியாகப் பொறுப்பேற்று அடுத்து வரும் சில தினங்களில் ஆறு மாதங்கள் பூர்த்தியாகப் போகின்றன.

அவரின் தனித்துவச் சாதனை என்று பேசுவதற்கு இந்த ஆட்சியில் ஏதுமில்லை என்பதுதான் கள யதார்த்தமாகும்.